काठमाडौं । राष्ट्रिय सहकारी महासंघले अन्तर्राष्ट्रिय सहकारी महिला सम्मेलनको तयारी पुरा भएको जनाएको छ । असार ६ र ७ गते दुईदिन ललितपुरको हेरिटेज गार्डेनमा गर्ने सम्मेलनको तयारी पुरा भएको महासंघले जनाएको हो । ‘नेतृत्वमा नारी, समृद्धिमा सहकारी’ भन्ने मूल नाराका साथ अन्तर्राष्ट्रिय सहकारी महिला सम्मेलनमा देशमा भएका महिला सहकारी र सदस्यले गरेको कामलाई विश्वसामु पुर्याउन सम्मेलन आयोजना गरिएको महासंघका कावा अध्यक्ष रमेश पोखरेलले जनाए ।

महासंघले आज सम्मेलनका विषयमा पत्रकार सम्मेलन गरी महिला सशक्तीकरण, आर्थिक आत्मनिर्भरता, तथा सहकारी क्षेत्रमा महिलाको नेतृत्वदायी भूमिकालाई अन्तर्राष्ट्रिय मञ्चमा उजागर गर्ने उद्देश्यले सम्मेलन आयोजना गर्नलागेको जनाइएको छ ।

नेपालमा ग्रामीण क्षेत्रमा ८० प्रतिशतभन्दा बढी महिलाहरू प्रत्यक्ष कृषि कार्यमा संलग्न छन् । नेपालमा सञ्चालनमा रहेका ३२ हजारभन्दा बढी सहकारी संस्थाहरुमा करिब ५६ प्रतिशत महिलाको सक्रिय सहभागिता रहेको जनाइएको छ ।

विशेषगरी कृषि सहकारीमा महिलाको नेतृत्व र योगदान उल्लेखनीय रहेको र नियमित बचत, अनुशासित वित्तीय व्यवस्थापन तथा ऋणको उत्पादनमुखी उपयोगमा उनीहरुको भूमिका उदाहरणीय रहेको कावा अध्यक्ष पोखरेलको भनाइ छ ।

यसैगरी कृषि, पशुपालन, साना तथा घरेलु उद्योग, हस्तकला तथा खुद्रा व्यापार जस्ता क्षेत्रमा महिलाहरुले सहकारीमार्फत लगानी तथा उद्यम सञ्चालन गरी ग्रामीण अर्थतन्त्रलाई गतिशील बनाउन महत्वपूर्ण भूमिका खेलेका छन् । ग्रामीण अर्थतन्त्रको आधारस्तम्भका रुपमा रहेको सहकारी क्षेत्रले महिला सशक्तिकरणमा महत्वपूर्ण योगदान पुर्याएकोले सम्मेलनले झनै सार्थकता पाउने कावा अध्यक्ष पोखरेलले बताए ।

सम्मेलनले महिला किसान तथा सहकारीकर्मीको योगदानलाई उजागर गर्ने, लैंगिक उत्तरदायी नीति तथा अभ्यासलाई सुदृढ पार्ने, महिला नेतृत्व विकास र संस्थागत सहभागिता वृद्धि गर्ने, तथा अन्तर्राष्ट्रिय असल अभ्यासहरुको आदान–प्रदान गर्ने मुख्य उद्देश्य लिएको उनको भनाइ छ । यसैगरी, उद्यमशीलता, रोजगारी, बजार पहुँच विस्तार, नीति संवाद र वकालतलाई प्रोत्साहन गर्ने, तथा अन्तर्राष्ट्रिय सहकार्य र नेटवर्किङ विस्तार गर्ने पनि सम्मेलनको लक्ष्य रहेको जनाएका छन् ।

सम्मेलनका क्रममा नीति संवाद तथा कार्यपत्र प्रस्तुति, महिला सहकारीबाट उत्पादित वस्तुको प्रदर्शनी, उत्कृष्ट महिला सहकारी उद्यमीहरुलाई सम्मान, सहकारी अवलोकन भ्रमण, सांस्कृतिक कार्यक्रम तथा विश्व सम्पदा अवलोकन, र ऐच्छिक हिमाली दृश्यावलोकन लगायतका विशेष कार्यक्रमहरु समेत आयोजना गरिने जनाइएको छ । यी कार्यक्रमहरुले सहकारी क्षेत्रका महिलाको सिप, उत्पादन, र नेतृत्व क्षमतालाई व्यापक रूपमा प्रदर्शन गर्ने अपेक्षा गरिएको छ ।